(កណ្តាល)៖ នាព្រឹកថ្ងៃសៅរ៍ ទី១៥ ខែសីហា ឆ្នាំ២០២៦ ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាលគណបក្ស និងសមាជិកគណៈអចិន្ត្រៃយ៍យុវជនថ្នាក់កណ្តាល ព្រមទាំងជាប្រធានក្រុមការងារគណបក្សចុះមូលដ្ឋានស្រុកស្អាង និងឯកឧត្តម គួច ចំរើន អភិបាលនៃគណៈអភិបាលខេត្ត និងជាប្រធានគណៈកម្មាធិការគណបក្សប្រជាជនខេត្តកណ្តាល បានអញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីគណបក្សស្រុក ឃុំ ភូមិ ក្នុងស្រុកកោះធំ។
ពិធីនេះមានការអញ្ជើញចូលរួមពីឯកឧត្តម នូ សាខន ប្រធានក្រុមប្រឹក្សាខេត្ត និងជាអនុប្រធានប្រចាំការគណបក្សប្រជាជនខេត្តកណ្តាល ព្រមទាំងឯកឧត្តម លោកជំទាវ សមាជិក សមាជិកា ក្រុមការងារគណបក្សចុះមូលដ្ឋានស្រុកស្អាង និងមន្ត្រីគណបក្សស្រុកជាច្រើនរូបទៀត។
ក្នុងឱកាសនោះ ឯកឧត្តម ប៉េង ពោធិ៍នា បានលើកឡើងអំពីសមិទ្ធផលសំខាន់ៗរបស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត។ សមិទ្ធផលសំខាន់ៗរួមមាន ការដាក់ឱ្យប្រើប្រាស់អាកាសយានដ្ឋានអន្តរជាតិតេជោ ការបញ្ចប់គម្រោងផ្លូវថ្នល់សំខាន់ៗជាច្រើន និងការអភិវឌ្ឍហេដ្ឋារចនាសម្ព័ន្ធជាតិជាបន្តបន្ទាប់។
ទន្ទឹមនឹងនេះ គម្រោងព្រែកជីកហ្វូណនតេជោ កំពុងដំណើរការសាងសង់ ដោយរំពឹងថានឹងរួមចំណែកបង្កើនប្រសិទ្ធភាពប្រព័ន្ធដឹកជញ្ជូនតាមផ្លូវទឹក និងផ្តល់អត្ថប្រយោជន៍កាន់តែច្រើនដល់ប្រជាពលរដ្ឋ។ ក្រៅពីនេះ រាជរដ្ឋាភិបាលក៏បានយកចិត្តទុកដាក់លើការអភិវឌ្ឍកំពង់ផែ ទីលានទុកដាក់សំរាម ស្ថានីយប្រព្រឹត្តកម្មទឹកកខ្វក់ និងការដោះស្រាយបញ្ហាបន្ទប់ទឹកនៅតាមសាលារៀនផងដែរ។
ជាទីបញ្ចប់ ឯកឧត្តម ប៉េង ពោធិ៍នា បានផ្តល់អនុសាសន៍ដល់ថ្នាក់ដឹកនាំ និងសមាជិកគណបក្ស ឱ្យបន្តពង្រឹងសាមគ្គីភាពជាតិ ប្រយុទ្ធប្រឆាំងការបំពានអធិបតេយ្យភាព និងខិតខំកសាងសមាជិកគណបក្សទាំងផ្នែកគុណភាព និងបរិមាណ។
ជាមួយគ្នានេះ គណបក្សត្រូវបន្តស្តាប់ និងដោះស្រាយបញ្ហាប្រឈមរបស់ប្រជាពលរដ្ឋឱ្យបានទាន់ពេលវេលា ព្រមទាំងពង្រឹងការផ្សារភ្ជាប់ជាមួយប្រជាពលរដ្ឋ ក្នុងនាមជាអ្នកបម្រើដ៏ស្មោះត្រង់ មិនមែនជាចៅហ្វាយនាយ ស្របតាមអនុសាសន៍របស់សម្តេចតេជោ ហ៊ុន សែន។ ថ្នាក់ដឹកនាំ និងសមាជិកគណបក្សក៏ត្រូវរៀបចំផែនការការងារឱ្យបានច្បាស់លាស់ តាមដាន និងវាយតម្លៃការងារជាប្រចាំ ព្រមទាំងពង្រឹងការងារឃោសនា និងផ្សព្វផ្សាយសមិទ្ធផលរបស់គណបក្ស។
សម្រាប់ការបោះឆ្នោតជ្រើសរើសក្រុមប្រឹក្សាឃុំ អាណត្តិទី៦ ឆ្នាំ២០២៧ អាជ្ញាធរត្រូវជំរុញ និងលើកទឹកចិត្តប្រជាពលរដ្ឋឱ្យពិនិត្យ និងចុះឈ្មោះបោះឆ្នោត ព្រមទាំងបន្តកែលម្អសេវាសាធារណៈឱ្យកាន់តែមានប្រសិទ្ធភាព និងឆ្លើយតបតាមតម្រូវការរបស់ប្រជាពលរដ្ឋ។
អនុសាសន៍ទាំងនេះមានគោលដៅប្រែក្លាយលទ្ធផលការងារជាក់ស្តែងទៅជាទំនុកចិត្តរបស់ប្រជាពលរដ្ឋ ដើម្បីបន្តបេសកកម្មថែរក្សាសន្តិភាព ស្ថិរភាព និងការអភិវឌ្ឍប្រទេសជាតិ៕
About the Author
