កណ្ដាល៖ នាព្រឹកថ្ងៃសៅរ៍ ៦កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៧ ខែតុលា ឆ្នាំ២០២៧ នេះ គណបក្សប្រជាជនកម្ពុជាសង្កាត់តាខ្មៅ បានរៀបចំពិធីបោះឆ្នោតស្ទាបស្ទង់ ដើម្បីវាយតម្លៃ និងចម្រាញ់យកបេក្ខជនក្រុមប្រឹក្សាសង្កាត់តាខ្មៅ ក្រុងតាខ្មៅ ខេត្តកណ្ដាល សម្រាប់ត្រៀមខ្លួនចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧។
ព្រឹត្តិការណ៍ស្ទាបស្ទង់មតិនេះ មានការចូលរួមពីបេក្ខជនឈរឈ្មោះសរុបចំនួន ២៩រូប ដែលបានត្រៀមខ្លួនប្រកួតប្រជែងក្លាយជាតំណាងពលរដ្ឋនៅថ្នាក់មូលដ្ឋាន ក្រោមអធិបតីភាពដ៏ខ្ពង់ខ្ពស់របស់ ឯកឧត្តម លី វុទ្ធី គណៈពង្រឹងចុះមូលដ្ឋានគណបក្សប្រជាជនសង្កាត់តាខ្មៅ ។
១. គោលបំណងនៃការបោះឆ្នោតស្ទាបស្ទង់
ដំណើរការនៃការបោះឆ្នោតស្ទាបស្ទង់នេះ ធ្វើឡើងក្នុងគោលបំណងសំខាន់ដើម្បី៖
វាយតម្លៃកម្រិតនៃការគាំទ្រ ប្រជាប្រិយភាព និងសមត្ថភាពរបស់បេក្ខជននីមួយៗ ពីសំណាក់សមាជិក សមាជិកា និងថ្នាក់ដឹកនាំមូលដ្ឋាន មុននឹងសម្រេចរៀបចំបញ្ជីឈ្មោះផ្លូវការតាមលំដាប់លេខរៀង។
ធានាថាបេក្ខជនដែលនឹងត្រូវជ្រើសរើសតំណាងឱ្យសង្កាត់ គឺជាបុគ្គលដែលមានលក្ខណៈសម្បត្តិគ្រប់គ្រាន់ ទទួលបានការទុកចិត្តខ្ពស់ និងមានឆន្ទៈពិតប្រាកដក្នុងការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។
២. ដំណើរការ និងការប្តេជ្ញាចិត្ត
ដំណើរការបោះឆ្នោតត្រូវបានអនុវត្តប្រកបដោយតម្លាភាព សុក្រឹតភាព និងយុត្តិធម៌ តាមរយៈការរៀបចំហឹបឆ្នោត បន្ទប់គូសសន្លឹកឆ្នោតសម្ងាត់ និងការរាប់សន្លឹកឆ្នោតជាចំហរ នៅចំពោះមុខអ្នកចូលរួម និងភាគីពាក់ព័ន្ធទាំងអស់។
បេក្ខភាពទាំង ២៩រូប សុទ្ធតែបានបង្ហាញពីការប្តេជ្ញាចិត្តរៀងៗខ្លួន ក្នុងការជំរុញការអភិវឌ្ឍហេដ្ឋារចនាសម្ព័ន្ធមូលដ្ឋាន ការផ្តល់សេវាសាធារណៈឱ្យកាន់តែមានប្រសិទ្ធភាព និងការលើកកម្ពស់សន្តិសុខសណ្តាប់ធ្នាប់ក្នុងភូមិសាស្រ្តសង្កាត់តាខ្មៅ។
៣. លទ្ធផលសង្ខេបនៃការគ្រប់គ្រងសន្លឹកឆ្នោត
សន្លឹកឆ្នោតសរុបដែលទទួលបានពីគណបក្សក្រុង៖ ២,០២៣ សន្លឹក
សន្លឹកឆ្នោតដែលបានប្រើប្រាស់ផ្លូវការដោយប្រជាពលរដ្ឋ និងក្រុមការងារគណៈកម្មាធិការ៖ ១,៣៦៩ សន្លឹក
សន្លឹកឆ្នោតនៅសល់៖ ៦៥៤ សន្លឹក
លទ្ធផលដែលទទួលបានពីការបោះឆ្នោតស្ទាបស្ទង់នាថ្ងៃនេះ នឹងក្លាយជាមូលដ្ឋានគ្រឹះដ៏សំខាន់សម្រាប់វាយតម្លៃកម្រិតសំឡេងគាំទ្រផ្ទៃក្នុង និងជាទិន្នន័យសម្រាប់គណៈកម្មការរៀបចំការបោះឆ្នោតថ្នាក់មូលដ្ឋាន ធ្វើការសម្រេចចិត្តចុងក្រោយ។
ការរៀបចំយន្តការប្រជាធិបតេយ្យផ្ទៃក្នុងតាំងពីដំណាក់កាលដំបូងនេះ បង្ហាញពីការត្រៀមលក្ខណៈបានយ៉ាងល្អប្រសើរ និងហ្មត់ចត់ ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ដែលជាព្រឹត្តិការណ៍នយោបាយដ៏សំខាន់នាពេលខាងមុខ៕
About the Author
